Qəlyanaltı və Salatlar

Bulqur salatı (Kısır)

Bulqur salatı (Kısır)

Türkiyədə hansı məclisə getsən, hardasa 90 faizində kısır adlı salatı süfrədə görə bilərsiniz. Elə Türkiyədən kənarda yaşayan türklərin süfrələrində də. Mən onu birinci dəfə dadandan sonra o qədər bəyənmişəm ki, Türk məclislərinə gedəndə gözüm həmişə kısır axtarır. Evdə özüm də hazırlayıram fürsət tapdıqca. Salat qısa vaxt ərzində hazırlanır. Sizə əsas lazım olan ərzaq bulqurdur, özüdə plovluq olan iri bulqur deyil, narın olanı.

Kısırın əsas ərzaqı bulqur və cəfəri olsa da, Türkiyədə hərənin öz kısır resepti var. Reseptlər regionlara görə də dəyişə bilir. Məsəl üçün, kimi buraya heç narşərab qatmır, kimi sarımsaq qatır, kimi soğanın acısını cıxardıb qatır, kimi isə heç soğan qatmır, kimi xiyar-pomidor-bibər də doğrayıb qatır. Bunlar hamısı zövq məsələsidir.Mənim sevdiyim resept budur. Şəkildəki narşəraba fikir verin, o buraya nə uzaq, nə yaxın – düz Azərbaycandan gəlib! Bəh bəh! Sizə nuş olsun!



Bulqur salatı (Kısır)

Ərzaqlar:

2 fincan xırda bulgur (Türkiyədə buna köftelik bulqur deyirlər)
2 fincan qaynar su
1 xörək qaşığı tomat pastası
1 xörək qaşığı qırmızı bibər pastası ( acılığı zövqə görə seçilir)
1/3 fincan zeytun yağı
1 orta ölçülü limonun şirəsi
2 xörək qaşığı narşərab
¼ fincan xırda doğranmış baş soğan
1 fincan doğranmış təzə cəfəri
½ fincan doğranmış təzə nanə
½ fincan göy soğan
Zövqə görə duz və xırdalanmış quru qırmızı acı bibər
Süfrəyə vermək üçün kahı yarpaqları

Birinci olaraq bulqur hazırlanır. Bulquru aşağıdakı 2 üsüldan biri ilə hazırlamaq olar.

1-ci üsul: Bulqur orta ölçülü qaba əlavə olunur. Ayrıca tomat və bibər pastası qaynar suda həll edilir və bulqurun üzərinə tökülür. Sonra isə üzəri qapaqla örtülür. Bulqur suyu tam canınca çəkənə və şişənəcən 20 dəqiqə bir kənarda saxlanılır. Sonra qapaq götürülür. Çəngəl və ya qaşıqla bulqur qarışdırılır.

2-ci üsul: Bulqur orta ölçülü qaba əlavə edilir.Üzərinə çıxana qədər qaynar su tökülür. Qapaqla örtülür. Su bulqura tam hopana və bulqur şişincəyə qədər 20 dəqiqə ərzində ağzı ötülü qabda saxlanılır. Hazır olduqda qarışdırılır. Üzərinə tomat və bibər pastası əlavə edilir.Bütün bunlar əllə yaxşıca qarışdırılır.

Daha sonra bura zeytun yağı,limon şirəsi,narşərab qatılır.

Doğranmış baş soğan və digər göyərtilər əlavə edilir və qarışdırılır. Zövqə görə üzərinə duz və qırmızı bibər qarışığı vurulur.

Hazır salat süfrəyə kahı yarpaqları ilə birlikdə verilir. Nuş olsun!

Humus

Humus

Humus Ərəb ölkələrinin ən məşhur məzəsidir. Bu, noxud, tahin (və yaxud tahini), sarımsaq, və limon suyunun qarışığından hazırlanan bir əzmədir. Humus süfrəyə adətən qızardılmış pita çörəyiylə verilir. Tahin küncüt əzməsidir. Supermarketlərdə tapa bilərsiniz.

Ərzaqları püre olanadək mətbəx robotundan  keçirin.

Hazır humusu qaba yığıb, qaşıqla ona girdab şəkli verin.

Üstünə zeytun yağı gəzdirin.

Şirin qırmızı bibər tozu səpin.

Tost olunmuş pita dilimləriylə süfrəyə verin. Nuş olsun!

Humus

Təxminən 6 pay üçün

Ərzaqlar:

1 ədəd 425 qramlıq (1 + 1/2 stəkan edir) noxud konservası və yaxud  gecədən islağa qoyulmuş yarım stəkan quru noxud
2 iri diş sarımsaq
3 xörək qaşığı tahin
3 xörək qaşığı limon suyu
Zövqə görə duz
Üstü üçün zeytun yağı və şirin qırmızı bibər tozu (bibər tozu yerinə humusun üstünə cəfəri səpə bilərsiniz)
Paprika

Hazırlanması:

Konservləşmiş noxuddan istifadə edirsinizsə, suyunun bir miqdarını saxlamaq şərtilə, noxudu süzün. Suyu lazım olacaq.

Əgər quru noxuddan istifadə edirsinizsə, onu bişənə qədər qaynadın, təxminən 1 saat. Təxminən 1 stəkan yarım bişmiş noxud alınmalıdır. Qazandakı suyun bir miqdarını saxlamaq şərtilə, noxudu süzün. Suyu lazım olacaq. Əgər humusunuzun daha hamar olmasını istəyirsinizsə, bişirdiyiniz noxudun qabığını soyun.

Konservləşmiş noxudun qabığı qabarıqdırsa, soyun, yox, əgər qabarıq deyil və çox yumuşaqdırsa, soymağa ehtiyac yoxdur.

Mətbəx robotunda noxud, sarımsaq, tahin və limon suyunu pürü halına gətirin. Bunu edərdək konservanın və ya noxudun bişdiyi sudan buraya bir az əlavə edin ki, kütlə bir az açılsın. Əgər səhfən konservanın və ya qazanın suyunu atmısınızda, narahat olmayın – adi sudan istifadə edin. Zövqə görə duz vurun. Zövgə görə tahin, limon suyu və sarımsağın miqdarını artırmaq olar.

Humusu qaba yığın. Üstünü qaşıqla “girdablayın.” Zeytun yağı gəzdirin. Şirin qırmızı bibər tozu səpin.

Pita tostlarıyla süfrəyə verin.

Pita Tostları

Qeyd: Pitaların üstünə yağ və duzla bərabər, istədiyiniz ədva, quru ot, hətta Parmezan pendiri də səpib bişirə bilərsiniz.

Ərzaqlar:

6 ədəd 15-sm-lik pita çörəkləri
Üçdə bir stəkan zeytun yağı
İri duz

Hazırlanması:

Sobanı 205°Cdək qızdırın.

Hər pita çörəyini  horizontal şəkildə 2 hissəyə bölün. Beləliklə 12 ədəd pita dairəniz olacaq.   Dairələrin qabarıq olan tərəfinə zeytun yağı çəkib, üstünə duz səpin. Hər dairəni 6 üçbucağa kəsin.

Üçbucaqları bir lay şəklində 2 ədəd listə sərin. Üstləri qızaranadək, təxminən 8-10 dəqiqə bişirin. Soyudub humusla süfrəyə verin. Tostlar xırt-xırt olacaq. .

Səhifə 1 - 71234...Son »