Bu yazını 29 fevral 2009 tarixində dərc etmişdim, bu gün isə bir qədər təzələdiyim resepti yenidən, video ilə bərabər yayınlayıram. YouTube kanalıma abunə olmağa unutmayın. Reseptlər ingiliscə səslənsə də, azərbaycanca altyazıları da var (CC seçin).
____
Yerkökü Salatı (Havuç Salatası) Türkiyə mətbəxinə aid olub, oranın süfrələrində ən çox rast gələn salatlardan biridir. Həm vitamin doludur, həm də ki, olduqca ləzzətli və sərinləndiricidir.
Salatı hazırlamaq üçün sizə sadəcə 4 əsas ərzaq lazımdır. Əvvəlcə köklər sürtgəcdən keçirilib yumşalanadək zeytun yağında bişirilirlər. Sonra isə sarımsaq-qatıqla qarışdırılıb soyudulur və süfrəyə verilir. Bu qədər asan.
YERKÖKÜ SALATININ HAZIRLANMA QAYDASINI VİDEODA IZLƏYİN:
YERKÖKÜ SALATI (HAVUÇ SALATASI)
4 pay üçün
Ərzaqlar
- 8 ədəd yerkökü
- 5 xörək qaşığı zeytun yağı
- Təxminən 2 stəkan qatıq
- 4 diş sarımsaq
- Duz
- Doğranmış şüyüd, bəzəmək üçün (mütləq deyil)
Hazırlanması
- Yerkökülərin qabığını soyun və sürtkəcin iri dişindən keçirin
- Tavada zeytun yağını qızdırın.
- Yerkökünü yağa əlavə edib, tez-tez qarışdıraraq yerkökülər yumuşalanadək təxminən 10 dəqiqə bişirin. Yerkökülər bir qədər diri qalmalıdırlar. Kənara çəkib, yerköküləri iri qarışdırma qabına qoyub soyudun.
- Sarımsağı əzin. Bir qabda qatıqla sarımsağı qarışdırın və soyumuş yerköküyə əlavə edin.
- Zövqə görə duz vurun və yaxşıca qarışdırın.
- Lazımdırsa, bir az da qatıq qatın – salat quru olmamalıdır.
- Salatı bir az soyuducuda saxlayın.
- Süfrəyə verməzdən əvvəl, istəyə görə üzərinə şüyüd səpə bilərsiniz.
Son şərhlər