Şirniyyatlar

Qaragiləli Yulaf Piroqu

Qaragiləli Yulaf Piroqu

Blueberry-Oatmeal Crunch Squares

2002-ci il. Biz Los Ancelesdəyik, təzəcə köçmüşük, yeni evlənmişik. Bir gün ailəvi dostumuz Cim Porter bizim mənzilimizə daxil olur. Əlindəki boşqabda da çox dadlı görünən bir şey var. Cim bizim üçün yulaf peçenyesi bişirib! Peçenyelər o qədər dadlı idi ki. Yumşaq, yulafla dolu, arasına da şirəli mürəbbə yaxılmış.

Peçenyeləri o qədər xoşladım ki, Cimdən resepti istədim. O da, sağ olsun, resepti mənimlə bölüşdü. Cimin resepti sonralar Uilyams-Sonomanın (Williams-Sonoma) şirniyyat kitabında rastıma çıxmış reseptə çox oxşayır. Aralarında olan kiçicik fərq yalnız inqredientlərin miqdarındadır. O reseptlərdən birini sizinlə bölüşəcəyəm.

Oatmeal

Təəssüf ki, Cim daha həyatda yoxdur. Üstündən illər keçib. Amma hər dəfə mən bu peçenyeləri bişirəndə Cim içində evdə bişirdiyi gözəl peçenyelər olan boşqabı fəxrlə mənə uzadır və mən bir fincan çayla onları ləzzətlə yeyəcəyimi düşünəndə gözlərim işıldayır. Cim, şirin xatirələrə görə sənə təşəkkür edirəm! Sənin peçenyelərin ən dadlısı idi!

Blueberry-Oatmeal Crunch Squares

Qaragiləli Yulaf Piroqu
Uilyams-Sonomanın (Williams-Sonoma)“Essentials of Baking” kitabındakı resept əsasında

İstəsəniz hətta cemin üstünə qoz ləpəsi də səpə bilərsiniz. Qoz xüsusilə də ərik cemi ilə yaxşı tutur. Bundan başqa siz bu peçenyeləri isti halda bir top dondurmayla da təqdim edə bilərsiniz. Çox dadlıdır!

Ərzaqlar:

280 q ağ un (1 +3/4 stəkan)
140 q yulaf lopaları (1  +1/2 stəkan)
220 q kip qablaşdrılmış qəhvəyi şəkər (1 stəkan)
1 çay qaşığı üyüdülmüş darçın
230 q soyuq duzsuz kərə yağı, 2-sm-lik parçalara bölünmüş
1 stəkan qaragilə cemi (bunu evinizdə olan istənilən cem, yaxud mürəbbə ilə əvəz edə bilərsiniz. Albalı, çiyələk, moruq, ərik və s.)

Hazırlanma qaydası:

Soba rəfini sobanın ortasına yerləşdirin və sobanı 165 dərəcə Selsiyə (165C) qədər qızdırın. 23 santimetrlik kvadrat listi kərə yağı ilə yağlayın.

İri bir cəmdə unu, yulaf lopalarını, qəhvəyi şəkəri və darçını yaxşıca qarışdırıın. Bu kütləni kərə yağıyla birlikdə xırda noxud boyda olan dənlərə bölünənə qədər bıçaqla doğrayın. (Əgər blenderiniz varsa  un, yulaf və şəkəri düyməni 2-3 dəfə qısa müddətə basmaqla qarışdıra bilərsiniz. Daha sonra kərə yağını əlavə edib maşını daha 8-10 dəfə işə salmaqla xırda noxud boyda dənlər əldə edənə qədər qarışdırın.)

Bu dən qarışığından 2 stəkan ayırıb kənara qoyun. Qalan dən qarışığını əvvəlcədən hazırladığınız listin dibinə və 2.5 sm hündürlüyündə kənarlarına kip döşəyin.

Cemi xörək qaşığı ilə götürüb bərabər qaydada həmin bu qatın üzərinə damızdırın. Sonra onu qaşığın arxası ilə elə yayın ki, bütün qat cemlə örtülsün. Əvvəlcədən ayırıb saxladığınız dənləri cem qatının üzərinə səpin. Səpdiyiniz dənlərin üzərindən basmayın.

Üzəri qızılı rəng alana qədər, təxminən 50 dəqiqə bişirin. Soba rəfinin üzərinə qoyub təxminən iki saat bərkiyənə qədər soyudun. İri, iti bıçaq götürüb 25 kiçik kvadrata bölün. Hermetik qabda otaq temperaturunda maksimum 3 gün saxlaya bilərsiniz.

Şərh yazmağı unutmayın! Onları oxumağı xoşlayıram:)

Blueberry-Oatmeal Crunch Squares

Şokoladlı Çələng Keksi

Şokoladlı Çələng Keksi

Chocolate Bundt Cake

Çələng keksi halqa keks formasında bişirilir. Formanın ortası deşikli olduğuna görə, alınan keks çələngə oxşayır. Bu keks yetəcək qədər şirin lakin ənənəvi şokoladlı kekslərdən daha yüngül, eyni zamanda kifayət qədər yumuşaq və çox dadlıdır. Reseptə istədəyiniz kimi əlavələr də edə bilərsiniz. Məsələn, qozdan və ya şokoladdan xoşunuz gəlirsə, xəmirə həm qoz həm şokolad parçaları əlavə edə bilərsiniz. Resepti bəyənəcəyinizi ümid edərək sizə xoş həftə sonu keçirməyi arzu edirəm!

Chocolate Bundt Cake

Keksin xəmirini hazırladıq.

Chocolate Bundt Cake

Xəmiri  keks formasına tökürük.

Chocolate Bundt Cake

Keks hazırdır!!!!

Chocolate Bundt Cake

Keksi kəsib, nuş edin!

Chocolate Bundt Cake

Şokoladlı Çələng Keksi
Cooking Light, January 2002 jurnalı əsasında (orijinal reseptin müəllifi – Alice Medrich)

Hazırlıqlara başlamamışdan əvvəl bir neçə məqamı da qeyd edim.

1) Bir dəfə əlimin altında espresso olmadığı üçün ondan istifadə etməməyi qərar verdim. Əvəzinə keksə qoz ləpələri əlavə etdim. Başqa bir vaxt isə espressodan da istifadə etdim. Hər iki halda qoz ləpələrindən istifadə edə bilərsiniz. Mən şəxsən qoz ləpələrinin əlavə etdiyi xırtıltını çox bəyənirəm. Hər iki halda şəkərin miqdarını artırdım cünki orijinal reseptin şirnisi çatmırdı.

2)  Orijinal reseptə görə süfrəyə verərkən keksin üzərinə bir az şokolad şirəsi (sirop) da tökmək olar. Lakin mən çox vaxt şəkər kirşanından istifadə edirəm.  Yenə də seçim sizindir.

Ərzaqlar:

1 stəkan un
1  stəkan + dörtdə bir stəkan şəkər tozu
Yarım stəkan şəkərsiz kakao tozu
Yarım çay qaşığı qabartma tozu
Dörtdə  bir çay qaşığı duz
Dörtdə  bir stəkan yumuşaq kərə yağı (otaq temperaturunda yumuşalmış)
2 iri yumurtanın ağı (otaq temperaturunda)
1 iri yumurta  (otaq temperaturunda)
Yarım stəkan az yağlı süd (tam yağlı da ola bilər)
2 çay qaşığı tez həll olunan espresso tozu (əlinizin altında yoxdursa, əlavə etməyə də bilərsiniz)
Bir çay qaşığı yarım vanil ekstraktı
Üçdə bir stəkan qoz ləpələri (qozun əvəzinə şokolad dənələrindən də istifadə edə bilərsiniz)
Yağ əvəzliyici sprey və ya kərə yağı (formanı yağlamaq üçün)
Şəkər kirşanı (üzərinə səpmək üçün)

Hazırlanma qaydası:

Sobanı 180C-dək qızdırın.

Unu və ondan sonra gələn 4 ərzaqı (undan duza qədər hamısını) dərin qabda qarışdırın . Sonra yağı, yumurta ağını və yumurtanı da əlavə edin. Mikserlə 1 dəqiqə ərzində aşağı sürətlə çalın.

Daha sonra südü, espressonu və vanili əlavə edib eyni qayda ilə bir dəqiqə qarışdırın. Xəmirə qoz ləpələrini əlavə edib əvvəlcədən yağlanmış halqavari keks formasına tökün.

Sobanın orta gözündə təqribən 35-40 dəqiqə bişirin (kibriti və ya kokteyl çubuğunu keksin ortasına batırdığınızda təmiz çıxırsa, keks hazırdır). Sobadan çıxartdıqdan sonra keks formada 10 dəqiqə soyumalıdır.

Keksi formasından çıxartdıqdan sonra kənara qoyub tam soyumasını gözləyin. Süfrəyə verməkdən əvvəl keksin üstünə şəkər kirşanı səpin.

Səhifə 2 - 211234...10...Son »